فين العدل ؟؟؟

من طرف احمد طه الإثنين 19 نوفمبر 2007, 12:49 am

السلام عليكم

انا بوجه رسالتى لأشخاص معينين و هم

اللى أخدوا عربيات و اللى أخدوا ألوفات

يا ترى الفلوس دى من مين ؟

هل هى من شينل ؟؟ و الا من مجهودهم الشخصى ؟؟ و الا من عرقنا احنا ؟؟

لو حد عنده الاجابة السليمة يبعت و يقولى يمكن أنا مش و اخد بالى

لكن اللى انا واخد بالى منه كويس ان كل واحد أخد قرش فهو مش من حقه

لأننا كلنا عارفين ان الشركة مشيت .. و ناس ركبت عربيات .. ها .. و ناس ركبتها العربيات

فهل ده عدل ؟؟ و الناس اللى ركبت عربيات عملت شركات .. من عرقنا و دمنا .. ها ..

و لو الناس دى عندها ضمير يعملو إعادة توزيع .. و لا يبقى فى واحد و اخد عربيات .. ولا واحد دايساه العربيات

و الناس المؤيدة أوى للموضوع يحسبوها صح من تانى .. قبل ما يبقو فريسة سهلة للطماعين و يحصل معاهم نفس اللى حصل قبل كده

على الأقل كانت من شركة صينية و الحكومة طردتها عشان هرشتها

انما دلوقتى زيتنا فى دقيقنا و مافيش حكومة تتدخل

و انتو فاهمين الباقى

يعنى من الأخر اللى ماعرفناش ناخده من الصينين هناخده من المصريين لأن ده حقنا أصلاً

و حقنا هيرجع لنا .. و الحدق يفهم .

سلام

من طرف MEMO TAHA الإثنين 19 نوفمبر 2007, 1:29 am

.: السلام عليكم و رحمة الله و بركاته :.

انا لأول مرة بادخل و بشارك معاكوا فى الرأى

و انا عاجبنى فى الموضوع كله الديمقراطية اللى حاصلة دلوقتى

بس انا لى تعقيب على بعض الأخوة الأفاضل من موزعى شينل مصر و بالتحديد الأستاذ / أحمد طه

و أحب أقوله " يسلم فومك يا أبو حميد على الكلمتين اللى انت قولتهم دول "

و ده لأن مش هو بس اللى اتقرص من الشركة اللعينة اللى اسمها " شينل "

و على فكرة انا كنت متحمس جداً فى بداية الموضوع فى السنة اللى فاتت أيام ما كنت باشوف الناس و هى فرحانة لمجرد ان هى دخلت المحاضرة و قال ايه (( دخلت و كبشت من الفلوس اللى هم كانو بيحكو عنها )) و اللى يغيظك فى الموضوع انك أول ماتدخل الشركة تحس انك مليونير

و أول ماتخرج منها تحس انك انت ولا حاجة

و انا بقول للناس اللى أخدوا عربيات و اللى اتكلم عليهم أحمد طه

ان كنتو عايزين يحصل معانا نفس اللى حصل قبل كده فده مش هايحصل

لأن الكلام ده اللى انتو نازلين بيه جديد مش هياكل معانا ..

لأن انتو أصلا ناس ماعندكمش عدل .. عايزين تاخدو ماتدوش .. و ان كنتو اتعلمتو حاجة من الصينيين فياريت ماتعملوهاش مع المصريين ..تانى .. لأن اللى اتلسع من الشوربة بينفخ فى الزبادى .. و انا بقى مش شايف أصلاً ان اللى انتو عاملينه ده زبادى .. عايزين تعرفو ده ايه ؟؟؟

من طرف **Admin** الإثنين 19 نوفمبر 2007, 6:26 am

قلبى معاكم .. انتم و الله مساكين

بس عارفين ليه .. لأنكم حلمتم الحلم اللى وصفه الأخ memo بإنه بقى مليونير بجرد ما دخل المحاضرة ... و هى دى الغلطة اللى وقعتوا فيها ..

إحنا قلنا من الأول إن الفرصة دى جوة الشركة تبقى قوية جدا وبرة الشركة مالهاش أى لازمة لأنك تابع لكيان تنتمى إليه ..

زى بالظبط سمكة القرش ... هى حيوان قوى جدا و مخيف و مفترس طول ما هو عايش فى البحر ... و أول ما يخرج برة البحر و لا له أى لازمة و هى دى الفرصة اللى حلمنا بيها ..

و نسيتوا خالص إن فى ناس بيحلموا و بيتعبوا عشان يحققوا حلمهم ... و فى كمان أرزاق مقسمها المولى عز وجل و ماحدش بياخد غير رزقه اللى كتبه له ربنا ...

و الصينيين اللى انت بتتكلم عنهم .. ماكانوش عايزين يمشوا .. و كانوا عايزين يقعدوا .. أما المصريين اللى انت بتقول عليهم زيتنا فى دقيقنا أهم رجعوا وقفوا على رجلهم تانى ... عارف ليه ؟؟ لأنهم ناس عندهم استعداد يضحوا و يتعبوا و يصبروا عشان يحققوا الحلم اللى حلموه و حطوا قدامهم هدف واحد بس ... النجاح ثم النجاح و النجاح ..

و المصريين دول هم أخوك و صاحبك و جارك و قريبك و كل أولاد عمومتك ..

و لازم تشوف نص الكوباية المليان .. مش تبص على النصف الفاضى و تقول ماهى نصها فاضى

و ياريت نحط ايدينا فى ايدين بعضنا و ننهض باقتصاد بلدنا اللى مات و اندفن من سنييييييين .. لازم نعمل حاجة .

الصينيين هم أحد الشعوب اللى أطلق عليهم النمور الآسيوية لأنهم اشتغلوا و تعبوا و قبل كل ده حلموا بالنجاح و خططوا و اشتغلوا لحد ما قدروا يغزوا العالم كله و أديك شفت بنفسك إحنا كلنا صدقناهم لأننا لقينا عندهم المصداقية و الثقة .. اللى منزوعة مابيننا و بين بعضنا ... لازم يبقى فى ثقة و اتحاد ... جرب تشوف الكيانات المصرية الجديدة و السوق المصرى اللى ابتدا ينتعش بنفس الأسلوب ..

و اذا كنت زعلان عشان الصينيين أخدوا فلوسنا .. أحب أقولك هم ادولك المقابل و بمزاجك ... و على العموم أهم مشيوا خلاص

و جرب تكسب حاجة واحدة بس ... حب الناس ليك و ازرع الثقة بينك و بينهم

و قريب نشوفك فى وسطنا و انت بتتكرم و بتاخد فلوس و بتركب الBM ساعتها هاتبقى تعمل ايه ؟؟؟؟؟؟؟؟

بجد كلام جميل وبرافوا عليك يا مستر مجدى وياريت كل الناس تعرف كده ونعرف ان الصنين ما نصبوا علينا بالعكس هما اعطوا لنا كنز كبييير جدا ولكن المشكله فى ان مين هو اللى ممكن يقدر الفرصه ويستغلها لازم نكون اقواياء لازم نحدد لانفسنا اهداف احنا شعب جميل وطيب ولكن بيخاف من التجربه والفشل وعايز ينجح من غير ما يفشل ولكن ده غلط انا لازم اقع وكمان افشل لان الفشل بدايه للنجاح وربنا بيعطى كل انسان على قد مجهودة وليس ذكائه فكر كويس فى النعم اللى ربنا اعطها ليك خليك واثق ومتاكد انك انسان مميز وان شاء الله ما تفكر فيه سوف تحصل عليه والاراده القويه والثقه والحب هما صفات الشخص الناجح والتقه بعد ربنا سبحانه وتعالى هيا فيك وبعد كده فى الاخرين وان شاء الله ربنا هايكرمك لازم تعرف ان مشوار طويل انت ماشى فى يعنى مش زى ما بيحصل فى الافلام ان البطل كان فقير جدا وفى اخر الفلم بقا غنى لا لاتنظر الى الافلام على انها وسيله راحه ليك وانك ممكن تعمل كده ولكن انظر للناس اللى حوليك اكيد الناس دى تعبت كتير وسهرت كتير وكمان مرت بيها ايام شقاء يعنى انظر الى من حولك فى هذا الموضوع وكمان شوف الناس دى كانت بتعمل ايه علشان توصل انت كمان للى وصلوا الناجحين اللى اكيد ان شاء الله انت واحد منهم
انا بشكر مستر مجدى على الموضوع الجميل ده وبجد احنا طول ما احنا مع بعض ممكن نحقق اكبر نجاح بس نعمل الكلام ده وكمان ندخله حاجه اسمها الفعل ولا تؤجل عمل اليوم الى الغد عايز تعمل حاجه اعملها لاتتردد ولاتقول بكره
لان العذر للفشل والاسباب للنجاح وربنا يوافقكم جميعا وانا بجد بحبكم جدا من قلبى واتمنى انى اخدم اى شخص

من طرف احمد الروبى الإثنين 19 نوفمبر 2007, 1:48 pm

السلام عليكم ورحمة الله وبركاته

فى البداية أحب اشكر الادمن على الرد الجميل واذى يدل على انه رجل فاهم تسويق مباشر صح وان من يريد النجاح يسعى اليه مش يقول ده ركب عربية وده أخذ فلوس كتير وعمال يبص على ماعند الناس ولايسعى لكى يفعل كما فعل الناس الناجحين وسعو وتعبو لكى يحصلو على ما حصلو عليه لماذا لم ينظر للذين يكسبو ملايين بل مليارات خارج شينل مثل شركة موبينيل وغيرها الى بياخدو فلوسنا بمزاجنا وفلوسنا دى تصل الى مليارات ولم نأخذ منهم مثل مااعطيناهم إنما شينل اعطت لنا الكثير الذى لايثمن بمال من علم وتدريبات وعلاقات وصحة ومال والكثير والكثير الذى لايعلمه إلا الذى كان بداخل شينل وتعلم منها صح وعرف كيفية العمل الصحيحة ولم ينظر بطريقة سلبية بل نظر الى الامر بطريق إيجابية انا واحد من الناس الذين كانو فى شينل ولم أخذ سيارة ولافلوس كتييييييييير بس إخذت علم وحاجات كثيرة لاتقدر بمال
وللحديث بقية
والسلام عليكم ورحمة الله وبركاته

من طرف **Admin** الإثنين 19 نوفمبر 2007, 2:02 pm

الله عليك يا روبى ...

هو فعلا كلامك كدة مظبوط ... بس يارب الناس تعيد التفكير و يدوروا و يشوف مين هم الناس اللى بياخدوا فلوسنا و برده بياخده فلوسنا و راكبين عربيات برده...!!!!

بس بقى أفخم بكتييييييييييير من اللى هم بيتكلموا عليهم

و ربنا يهدى

من طرف MEMO TAHA الإثنين 19 نوفمبر 2007, 4:07 pm

......::::::: السلام عليكم و رحمة الله و بركاته ::::::.....

طبعاً انتو بتتكلموا كده و بصدر و اسع لأن كل واحد فيكو داق طعم النجاح فى شينل .. تقدروا تقولوا لى كان هيبقى ايه موقفكم لو كنتوا اتضربتوا ضربة قاضية زى اللى حصلت مع كتيير من الموزعين اللى يا عينى راحوا ورا أوهام ناس تانية بنيتهالهم .. لكن مش ده المهم .. المهم ان احنا فوقنا من أحلام اليقظة و الحمد لله قدرنا نقف على رجلينا من تانى بس المرة دى بقى على أرض الواقع بعيد عن أحلام شينل و غيرها من شركات التسويق المباشر .. اللى ممكن يفكرو يعملو زيهم ..

أما بقى بالنسبة للتدريبات اللى انتو اتعلمتوها دى فانتو بس اللى استفدتم منها و بالفلوس اللى انتو أخدتوها مننا عملتو بيها شركات و أشياء أخرى و افتكرو كويس انكو كنتو فى الأول بتتمنوا ان حد يقعد معاكو و تكلموه و تشرحو له الفرصة و مايمشيش الا لما يكون متعاقد فى الشركة و لما بقيتو نجوم و مديرين ماسيين .. بقى محدش بيشوف و شكوا تانى فى الشركة .. كان فين المتابعة اللى انتو كنتو بتحكو عنها ؟؟؟

و بالنسبة للفلوس بتاعت موبينيل و الشركات الأخرى فالفلوس دى احنا بناخد قصادها خدمات احنا من غيرها مش هنشتغل .. صح و الا غلط ؟؟؟ و قبل ما تقولولنا مساكين نراجع نفسنا .. ياريت تراجعو انتو نفسكو و تشوفو انتو بتشتغلو صح و الا غلط و ياريت تبطلو توهمو الناس تانى بالمواضيع الجديدة اللى انتو نازلين بيها عشان كده كفاية بقى .. و الا ايه ؟؟؟

من طرف هاكربوي السبت 24 نوفمبر 2007, 8:40 pm

ربنا معاك يا اخي

اصلا النظام الظالم ده قايم على ان المفروض 92% من اعضائة يتفرموا علشان ال 8% ياخدوا فلوسهم مجرد فلوسهم مش يكسبوا
طبعا انا مش هاقول النسبة بتاعة كام في % علشان تاخد موبايل او حتى 2000 جنيه لانها نسبة مفجعة فما بالكم بالنسبة الخاصة بالحصول على السيارة
ربنا معاكم ياللى اشتركتوا في الشركة دي
وربنا يسامح كل اللى اخد حق غيرة وساهم في نجاح هذا النظام الظالم
واللى مش مصدق يحسبها واللى مش عارف يكلمنى وانا احسبها معاه

من طرف **Admin** الأحد 25 نوفمبر 2007, 3:32 am

يا سيد هاكر انت بتقول انك بتعرف تحسبها طب ممكن تحسبهالى؟ .. أحسن انا ضعيف فى الحساب !!!

أما نشوف خليك ورا الــ .... لباب الدار ..
بس تصدق بإيه ؟؟ أحسن حاجة فى الدنيا إنك تتكلم مع شخص مجهول الهوية ..
بتحس كدة انك بتكلم نفسك و إنك انت بس اللى على حق .. أه ماهو التانى ده !! مش معروف له أصل ...
و سلم لى على الحسابات .. سلام

فين العدل ؟؟؟

فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟

رد: فين العدل ؟؟؟